William Wordsworth

Dr William Wordsworth (* 7. April 1770 z Cockermouth, Grossbritannie; † 23. April 1850 z Rydal Mount, Grossbritannie) isch e britische Dichter und e füehrends Mitgliid vo dr änglische Romantik gsi. Er het 1798 zsämme mit em Samuel Taylor Coleridge die Lyrical Ballads (Lyrische Gedichte) verfasst, wo as ersts Wärk vo dr änglische Romantik gälte.

Siis Meisterwärk isch s früehje autobiografische Gedicht The Prelude (Präludium). Wie anderi Romantiker (z. B. dr Friedrich Schiller) au isch er vo de politische Ereignis stark beiflusst worde. Im Napoleon het er d Verkörperig vo dr Tyrannei gseh, und er het es Gedicht, Thought of a Briton on the Subjugation of Switzerland (Gedanke vom ene Brit über d Underwärfig vo dr Schwiiz) gschriibe, wo vom Ufstand vo de Schwiizer Föderaliste im Stäcklichrieg gege d Regierig vo dr Helvetische Republik, ere Dochderrepublik vo dr revolutionäre Erste Französische Republik, beiiflusst worden isch.^[1]

1. ↑ Thought of a Briton on the Subjugation of Switzerland